Source: New Zealand Government
ngā mātāpono o Te Tiriti o Waitangi, ko te tautoko kia tokomaha ake a ngāi Māori e uru ana ki ngā toronga mahi, ki ngā kuratini ako hoki i roto i ēnei wā whakatikatika i te KOWHEORI-19, koinei ētahi o ngā kaupapa kei te iho o te Te Mahere Whai Mahi Māori hou a te kāwanatanga e ai ki tā te pānuitanga a Carmel Sepuloni, te Minita Whakahiato Ora, Whai Mahi hoki i tēnei rā.
“He pāraharaha anō Te Mahere Whai Mahi Māori kei tō mātou kete e tautoko nei i te rautaki whai mahi a te kāwanatanga,” te kōrero a Carmel Sepuloni.
“E whakaraupapatia nei e Te Whai Mahi tā mātou manawanui ki te tautoko i ngā kaupapa Māori, i te hiahia kia whāia te tikanga kanohi ki te kanohi, me te kōtui atu hoki ki ngā whānau, ki ngā hapū, ki ngā iwi me ngā hapori whānui ki te whakapai ake i ngā hua e puta ake ana kia ngāi Māori.”
“E mōhio nei tātou, e ea ai ngā raruraru e pā ana kia ngāi Māori, e kitea ai ngā putanga hua me te ārai atu hoki i ngā tīwehewehenga i waenganui i a ngāi Māori me ngāi tauiwi, e tika ana me mahi tahi atu mātou ki te tautoko i a ngāi Māori kia ora hei hunga kaimahi Māori, hei kaitukumahi Māori, hei kaikōkiri haere i te ao ōhanga Māori me te ōhanga whānui, hei kōtuinga Tiriti hoki.”
“He kaupapa Te Whai Mahi mā ngāi Māori, ahakoa ko wāi, ahakoa nō hea. Mēnā wahine tūtūtoa Māori koe, mēnā he tangata whaikaha e hiahia ana ki te uru ki ngā tūranga kaihautū, mēnā he kaumātua rānei koe e hiahia ana ki te whakapakari i ōu pūkenga, mā tēnei mahere koe e tautoko ki te whai i tāu huarahi,” te kōrero a Carmel Sepuloni.
Hei tā te Minita Whakawhanaketanga Māori, a Willie Jackson, he mea hirahira te tautoko kia tokomaha ake a ngāi Māori e uru ana ki ngā toronga mahi, ki ngā kuratini ako hoki i roto i ēnei wā whakatikatika i te KOWHEORI-19.
“Ka tautoko a Te Whai Mahi i te manawa titikaha o te ao ōhanga Māori kia mātūtū mai anō i ngā whakararu a te KOWHEORI-19, me te mārama hoki me pehea e kaupare ai ngā tūkinotanga mai ki te ōhanga hei ngā rā ki tua.”
“Kei te whānui haere te ao tuku mahi Māori, ka mutu, he whānui ake ki tā te ao tuku mahi o tauiwi. Nā reira, ko tā tātou mahi he whakapai ake i ngā putanga whai mahi mō rātou, kia tokomaha ake ngā kaimahi me ngā kaitukumahi Māori e whai pūkenga ana kia rite ai ki te whai mahi hei ngā rā ki tua,” te kōrero a Willie Jackson.
E tautoko ana Te Whai Mahi i te rautaki whai mahi whānui a te kāwanatanga, me ētahi hoki o ngā mahere whai mahi e ono e hāngai pū nei ki te taupori. Ka whai haere ēnei i te maha o ngā hōtaka me ngā kaupapa whai mahi a te kāwanatanga, ā, kei te kitea ngā hua angitū.
“Ko tā Te Whai Mahi he hāpai ake kia whāia tonutia tēnei ara e nui ake ai te tokomaha o ngāi Māori e whakapakari ana i ō rātou pūkenga kia uru rātou ki ētahi tūranga mahi whai hua, tūranga pūmau, tūranga pai nei hoki te utu,” te kōrero a Carmel Sepuloni.
Ko tā Te Mahere Whai Mahi Māori he whai haere i ngā mahi a Te Ara Mahi Māori, he rōpū motuhake Māori kua whakatūria hei kaitohutohu mā ngā Minita i roto i ngā wāhanga matua o tēnei Mahere Hohe.
