Source: New Zealand Government
Kua tauākitia e te Minita Manatū Taonga, e Carmel Sepuloni, he 18 ngā hinonga hei tautoko i ngā iwi, ngā hapū, ngā whānau me ngā hapori Māori ki te tiaki i ngā mātauranga Māori e noho mōrearea nei, kia whakahaumarutia ngā mātauranga taketake i ngā pānga o te mate korona.
Ko te tahua mō ēnei hinonga i ahu mai i te hōtaka Mātauranga Māori Te Awe Kōtuku, he $20 miriona te uara, i hua mai ai i te Tahua 2020. Ko roto i ngā hinonga matua nei ko te tuku pūtea ki ngā whakahaere ahurea ā-motu e mahi tahi nei me ngā hapori ki te whakarato i nga wānanga me ngā hōtaka whakangungu, waihoki ko ngā tahua e taea ana te tohe mō ngā momo hinonga.
“Nā te Mate Korona i mārakerake ai te kite i ngā mōrearea ka pā ki te Mātauranga Māori, ko te nuinga e mau nei i te tokoiti o ngā tohunga me ngā ringa toi – he kaumātua te nuinga – ka noho mōrearea nei ki ngā pānga o te Mate Urutā” ki tā Minita Sepuloni.
“He mea hira rawa atu kia tautokona e mātou ngā iwi, ngā hapū, ngā whānau kia tiakina, kia whakaorangia hoki ēnei mātauranga ahurei, te pūtake o te tuakiri me te oranga Māori. He mea nui whakaharahara te Mātauranga Māori ki a Aotearoa me ōna tāngata.”
Ko te nuinga o ngā hinonga nei, ka tīmata ā te tīmatanga o 2021, ā, ka tū mō ngā tau e rua. Ko ētahi o ngā hinonga nei:
- Ko te tahua Mātauranga Māori Marae Ora, he tahua hou e tuku atu ana i te $5.7 miriona Mā tēnei tahua e tautoko ngā hinonga e tiaki nei, e whakaora nei hoki i ngā mātauranga me ngā taonga kei ngā marae huri noa i te motu.
- ngā wānanga e tautoko ana i ngā iwi, ngā hapū, ngā whānau, me ngā hapori Māori ki te tiaki, ki te toha hoki i ō rātou mātauranga e pā ana ki:
- Ngā toi Māori, kapa haka, hanga whare, wāhi tapu, me ngā wāhi tūpuna
- tiakanga me te toitūtanga o ngā momo taonga me nga mātauranga katoa, mai i ngā kiriata me ngā hopunga reo, tae noa ki ngā pūeru.
- he hinonga e ārahina ana e ngā tohunga me ngā pūkenga hei whakatairanga i te whakarauoratanga o ngā toi e tāmate haere ana, ina koa ko ngā taonga puoro me te tārai waka.
Ka kitea he rārangi o ngā hinonga katoa o te Mātauranga Māori Te Awe Kōtuku ki konei.
“Ko ngā hinonga 18 kua tauākitia i te rā nei, he mea whakahaere e ngā tari kāwanatanga me ngā ratonga ahurea e waru, e mau nei ngā tohungatanga mō te mātauranga me ngā taonga Māori, ā, me pēhea hoki tō rātou tiakanga, toitūtanga hoki,” ko tā Minita Sepuloni
“Ka mahi tahi ēnei whakahaere me ngā tohunga, ngā ringa toi, ngā whānau, ngā hapū, me ngā iwi kia whakaratohia ēnei hinonga puta noa i te motu.”
Ko ngā rōpū whakahaere e waru ka whai wāhi mai ki te hōtaka Matauranga Māori Te Awe Kōtuku, Creative New Zealand Arts Council of New Zealand Toi Aotearoa, Heritage New Zealand Pouhere Taonga, Manatū Taonga Ministry for Culture and Heritage Ngā Taonga Sound & Vision, Te Matatini, Te Papa Tongarewa Museum of New Zealand, Te Puni Kōkiri me Te Tari Taiwhenua.
